琦琦 的分享空間

後日7月3 號, 亦係我係呢間公司踏入第二年的日子.

時間真係過得好快, 亦發生左好多事. 特別係呢幾個月, 真係鑊鑊新鮮鑊鑊金.

自從4月頭俾人逼遷之後, 有人被調走, 有人辭職唔做, 攪左一大輪, 唸住可以有d安樂日子過下之際, 我們又再度再度再度再度再度....................
被逼遷啦 ╲ 皿 ╱

不過攪笑的係竟然今日會同實君由同學變成同事. 其實初畢業之後的第一份工, 已經同另一個同學一起返工, 不過就唔同部門. 今次就同實君, 仲要係同部門. 哈哈........其實呢個行頭真係好窄 !!

係我的職歷入面, 做得最長的就係第一份工, 做左兩年半. 唔知我呢份工捱唔捱得過兩年半呢 *o* '''

上個週末連放左3日假, 係端午節果日就同D朋友去試左呢間KING LUDWIG BEERHALL.

其實一早已經聽過呢間野, 上網睇過食評, 又聽過朋友介紹都話唔錯, 只係一直無機會食. 趁住又有飯局, 就一於要去試下啦.....

呢間食德國野的餐廳, 雖然門口細細, 望入去似係PUB多D, 但入到去就有2層, 仲有卡位 . 我地得3個女仔, 但係可以坐D5-6人卡位, 所以好舒服. 而且由於早食, 仲未有好多人, 唔會好嘈& 服務都算OK.

我地一來就點哂D招牌菜 : 德國豬手, 農夫包, 麥啤, 海鮮忌廉汁伴薯餅.....

德國豬手係幾乎枱枱都會叫的野, 上菜的時候好特別. 侍應會將一大個熱辣辣脆卜卜的豬手放上針板, 先起肉再上. 侍應一刀落的時候, 已經卜卜聲, 未食已經知好脆. 入面D肉就仲好"林". 另外一樣好好味的就係薯餅, 唔同老麥果D, 係將一絛絛刨到好細絛的薯仔,再搓成餅煎香. 好脆又唔粉..........正!! 仲有個海鮮忌廉汁都好好味, 有3粒帶子同3隻蝦, 好逼真 !! 農夫包有D特製的醬, 不過可能因為已經好飽而且佢脆得來偏向硬, 所以我麻麻地. 呢度的啤酒都出名, 有好多種選擇, 我地叫左清淡口味的麥啤, 我飲左幾啖, 都覺得幾易入口. 不過我都係鍾意飲呢度的mix  juice多d........

埋單都唔平, 不過如果下次有多d人, 應該可以試多d野同平D.

昨晚看了一場等待左好多年的演唱會, 感覺好似返番去十多歲仲讀緊書的時候............

記得果陣時雖然仲未識日文, 但係就好迷d日本明星. 零用錢都拿哂來買CD, 雜誌. 好想邊個邊個來香港做宣傳, 來開演唱會等等.果時好想睇 L' Arc~en~Ciel, 但係一直都無機會.

之後大下大下, 慢慢就無再咁狂熱. 特別係出來做野之後, 更加無時間. 點知前排個fd 話佢地會來香港開演唱會,  咁點都要捧下場 ge!

一如所料, 好多去睇的都係d靚妹靚仔, 我同個fd都應該係佢地之中叫上左年紀的一批o黎家啦...............唉 =_=

雖然好耐無聽佢地d歌, 有d新歌都唔識, 但係氣氛好好, 無悶場.

睇完之後, 勾起好多以前的回憶. 原來有時懷舊下感覺都不錯 !!

離開左個blog一段時間, 不知不覺間都有半年啦! 好似有好多野發生左, 又好似無咩野特別事咁.............原來無將生活點滴記下的話, 就好容易隨住時間的過去而遺忘 !

近排都發生左好多令人唔開心的事, 天災人禍, 希望大家都能珍惜生命, 好好去過每一天 !!

由27號開始返工, 一返就返到今日, 一直無停過. 真係好攰..............! 忙下忙下, 咁就過左一年啦!

新一年我的好朋友就送左一份好難忘的禮物俾我. 事源係咁的, 31號我仲係公司搏命的時候, 收到好朋友的信息, 問我果晚去邊玩. 但係忙到無時間回覆. 跟住今朝就再收到好朋友的另一個信息如下 : 我們以後不要再聯絡了, 自己做了什麼自己清楚.

一收到, 嚇得我呀! 唔通因為無覆信息所以嬲左. 唔係新年留留就激嬲朋友咁大檸樂呀! 我即刻回覆講哂對唔住啦. 跟住好朋友覆番叫我睇清楚d個信息. 原來再拉落去下面仲有一段文字如下 : 醫生說我血糖過高, 不要靠近甜的東西, 而你是我朋友中最甜的一個.... 祝你除夕快樂,,,哈哈哈.

又俾人玩到啦 > ~ <

繼上週第一次覆診之後, 今天便是第二回的覆診日. 一直都被傷口的痛同頭痛所困擾, 趁是次覆診, 問一問醫生有咩解究.

"頭痛跟傷口痛有關, 再者手術時有流血, 之後我又食唔到野, 見議我食多d紅豆之類含鐵質的野補充番" 醫生就係咁笞啦!
之後再幫我睇睇個傷口, 有d手術線鬆鬆地, 醫生就話可以拆線. 拆之前, 滴左d藥水係傷口上面, 有些少滴左係絛脷度, 好"乸", 又聞到好臭. 原來果d係麻醉藥水, 跟住就開始拆線, 雖然係有用麻醉藥水, 但係都唔代表唔痛, 由其是係越入的位置就越難拆. 醫生都話聯針難, 拆線又係咁難. 但我就覺得係聯針痛, 拆線又痛. 忍忍忍............! _ ! 眼水都標出來 漱口時手都震埋. 吐第一啖時好多血絲, 之後用左2杯水沖先至無血絲.

醫生今次除左開止痛藥俾我之外, 仲俾左d維他命丸. 下一次覆診就係兩星期之後.

見完醫生出返去接待處的時候, 見到有個女仔坐係輪椅上, 塊面好腫, 個口仲有d流血, 個女仔係咁抺. 我估佢同我可能都係做一樣的手術, 見到佢咁, 就唸返兩個星期前的自己. 我都希望兩個星期後再來覆診的時候, 都會好得七七八八啦!

自從手術之後, 一直都在家中休養. 我出街的次數真係十隻手指都數得出, 而出得街都係去覆診.

今天就要去佐敦牙醫果度覆診啦. 一直都無咩點出街, 出到去嚇然發現有好多聖誕的裝飾同佈置. 其實望住月曆都會知下個星期就已經係聖誕節, 但係原來一直躲在家中, 無親身見到街上的聖誕裝飾的話,真係完全feel唔到咁怏就聖誕節.

不過相信呢個亦會係最唔關我事的聖誕節. 依家食野仲係好辛苦,所有的聖誕大餐我無份之外, 去到太多人的地方我都有d頭痛, 又怕被人撞到. 所以唯有乖乖地自己係屋企養病啦 > _ < ""

今天係手術後第一次的覆診. 手術之後因為怕我上面的牙齒會咬傷下面的傷口, 所以一直要用牙套. 今天覆診的時候, 上面的牙套就可以拆啦. 剛剛用牙套的時候好唔習慣, 咬野, 講野的時候都覺得怪怪咁. 點知到今日拆左之後, 食野果陣又係唔慣, 好似排牙咬唔到野咁. 又要再花一點時間先可以適應.

過多一個星期之後, 就要去第二次覆診, 到時再看看傷口的狀況. 醫生問我有無食止痛藥, 其實我一直有定時食. 不過醫生話盡量唔好太依賴止痛藥. 咁我今日返到屋企, 就唸住試下唔食一日. 點知痛到係張床" 典 " 左成個鐘, 最後都係頂唔順.  希望到下一次覆診的時候會好點啦!

我發覺每天起床的一刻都是最辛苦的. 昨晚又發惡夢,因牙關咬得太緊而痛醒. 雖然今日已經去到手術後的第六日, 面部看起來亦比我剛做完手術後的明顯消腫了很多, 但是痛楚卻有增無減. 一日三次的止痛藥好像已經發揮不了多少作用.

不過進食方面都有多少進步, 昨晚可以輕輕嘴嚼, 食到一碗雲吞河. 雖然之後的代價係傷口痛楚非常, 牙較疲倦不已, 不過都係一個好開始.

星期四就要去覆診, 到時就差不多要決定復工的日子. 老實說, 如果可以, 我希望放到明年.  不過明知除了辭職之外, 根本無可能. 唯有盡力, 只希望我進食困難, 口齒不清 頭暈發燒等症狀到返工的時間已經無啦!

今天早上起來, 感覺好辛苦. 兩邊腫起來的面頰好痛, 可能係晚上側睡時壓到傷口所造成. 再用手摸摸兩邊面同下巴, 感覺再回復一點. 手術之後, 兩邊面同下巴都經常有麻痺的感覺, 亦因為咁, 我對傷口痛楚的感覺都唔係太強. 但隨住感覺開始回復, 傷口就越來越痛.

望望鐘, 其實已經過左今朝應該食藥的時間. 好辛苦地起床, 用盡氣力去勉強刷刷牙. 我感覺到個胃好空, 唔食少少野就食唔到止痛藥. 但係望住d野食, 真係好無胃口. 跟住個胃就好痛, 仲發生左一件我一直最怕發生的事 ---- 就係嘔啦!

 平時嘔已經好辛苦, 呢個時候嘔就更加要命. 口入面又有傷口, 就連咳一下就會覺得痛. 呢次只可以嘔到d氣出來. 我又反胃又食唔到野, 唯有訓係度再用個暖水袋敷下個胃, 希望無咁辛苦啦. 休息左一陣, 唸住好少少, 可以試下食野啦. 點知一起身就又想嘔, 好在早有準備嘔吐袋. 今次一嘔就嘔黃胆水. 不過嘔完之後就舒服好多, 再休息多陣就可以食野同食藥啦.

頭先訓醒之後, 終於都可以正正常常咁食番一餐啦.

星期五出院後的晚餐係碎菜肉粥, 不過d肉碎全部食唔到

星期六的午餐同晚餐都係白粥 + 蒸水蛋 + 蒸魚

而是日晚餐係史雲生清雞湯煮超淋貝類粉, 食左2大碗, 食完之後牙較都軟哂, 好攰. 不過食到野點都好過食唔到.

跟住我又要再為明天的膳食傷腦筋啦!!!

 

 

 

 

2:15  ......我睜開眼第一樣望到的就係掛在牆上的時鐘.原來不知不覺間已經睡到下午.

 

今朝發生的事還記得很清楚.12月5日, 早上07:45入院, 一去到醫院已經十分多人, 登記之後, 姑娘立即叫我換上手術穿的衣服, 鎖好自己的私人財物, 量血壓, 見醫生, 做問卷, 去洗手間等等......一輪的趕忙之後,八時半左右就被帶進手術室. 去到手術室, 依然都係忙個不停, 我就連驚的時間都無就已經睡在手術床上. 他們在我的左手插上靜脈注射器, 又在身上貼上心跳的監測器. 手術前他們已為我配血, 其實當時很想問下自己的血型, 但係見到人人都咁忙碌, 我最終都不敢問. 之後姑娘就叫我聞氧氣, 我知道聞完之後好快就會睡著. 起初輕輕吸一口, 好像甚麼都聞不到, 還以為氧氣未準備好, 姑娘再叫我深呼吸, 我再吸多一口, 開始覺得有點麻痺的感覺, 吸不到第三口, 我就已經昏睡了.

一睡就睡到下午二時多, 身在恢復室的我全身都未有知覺, 只係可以開眼望到, 隱約聲到, 思緒還是很凌亂. 不過我記得麻醉期間應該沒有發夢, 反而在恢復室時好像發了一個跟工作有關的夢, 之後就甦醒過來. 到三時許, 我就被帶離恢復室, 送上7樓病房. 過床時姑娘見我開住眼, 問我自己有無力, 我搖搖頭, 其實當時我除左清醒多一點, 右手稍為有點力之外, 我全身都係無法活動. 之後姑娘把我的私人物品拿上來病房, 我第一樣最想拿電話, 但是拿不到, 想叫姑娘幫忙, 但她們說不可以隨便碰我的物品, 叫我等家人來到再找. 那一刻, 好難受, 好像是有生以來第一次發覺自己咁無用, 連拿一個電話咁基本的動作都做唔到. 不過無辦法啦, 唯有再等麻醉藥過多一陣先有力去拿.

隨著時間慢慢過, 意識和活動能力都開始恢復.拿住鏡子看看自己, 個樣好殘, 一邊嘴角損左, 個喉嚨, 鎖骨位置, 大脾同腰位都痛. 可能係長時間無活動所造成. 另外塊面好腫, 好似一隻小松鼠,下巴位置好痺, 吞口水時都會有困難,有時甚至會不自覺流口水.之後醫生都來看過我, 跟我交待手術的詳情. 原來成個手術係由09:00 – 12:45, 流左大約300cc血, 失血情況唔嚴重, 所以都無輸血, 我問醫生知唔知我的血型, 醫生話如果無記錯, 應該係A+, 我一直都以為自己係O型, 希望醫生無記錯啦!

第一日唔可以落床, 唔可以食野同飲水, 只可以依靠吊鹽水. 如果想去洗手間, 亦只可以叫姑娘拿vv盆係床上攪掂. 而且因為左手駁住鹽水, 手上又有個靜脈注射器, 一碰到就會好痛, 所以要好小心. 到左探病時間, 見到有朋自遠方來, 不亦樂乎!雖然塊面好腫, 個傷口又好痛, 但係都忍唔住要講野. 當晚一直都無事, 但係到左大約7時許, 我就開始好頭暈, 姑娘之前幫我較高張床, 因為怕我會嘔. 再量一量血壓, 發覺我血壓偏低, 而且有發燒, 就幫我較番低張床, 叫我側身訓, 再幫我打針, 過左一陣先開始好番一點.之後都係訓下醒下, 因為在晚上姑娘會定時幫我量血壓, 打針同探熱, 所以基本上係訓唔到.

咁樣就捱過左第一晚, 醫生說第一晚係最辛苦, 而且可能會嘔, 但我好好彩無嘔到. 12月6日, 第二天早上9時許, 醫生再來看我, 說今天可以開始飲少少水, 拆除鹽水喉, 之後就可以落床. 雖然可以飲水, 但其實飲啖水都有難度, 要用吸管慢慢飲. 跟住一直等到11時許, 姑娘先得閒幫我拆喉, 再用輪椅送我到樓下照x ray 同檢查傷口. 其實我已經有力自己行, 不過病房的姑娘都唔准我自己行. 去到樓下照完x ray,檢查完傷口之後, 我就同醫生講想去個洗手間先返上去. 終於先至有機會可以自己落地實實在在咁行啦. 之後姑娘再用輪椅送我返上病房, 上到去就差不多要食我的第一餐. 當天午餐係一碗粥加一包小橙汁, 其實碗無味粥都真係幾難食, 不過因為已經一日多無食過野, 所以都有胃口食哂成碗, 食完午餐, 再睡多一會, 4時許又有一罐奶, 暫時罐奶係我覺得最好飲的. 之後又係睡覺, 到6時許就食晚餐, 同午餐有少許不同, 就係由橙汁變左做萍果汁, 但係碗粥就越來越難食.

我住的係7B的18號床, 同房有另外5個人, 4位係婆婆, 另外1位係我住院第2天早上就轉院, 係一位太太, 跟住下午左右就來左另一位小姐. 不過最細的都係我. 係外科部住的大多數都係婆婆, 有一些係獨居老人或者係老人院住的. 病房的姑娘其實都幾惡, 會嘩佢地.雖然我都睇得出姑娘有好多工作要做, 不過就唔係好明點解佢地好似覺得班婆婆好煩, 而且會向班婆婆發脾氣. 可能真係要去到呢個工作環境先會明白啦!  不過到我老左, 又好多病的時候, 希望我有錢住私家醫院啦, 咁就唔使咁慘, 病都要被人鬧!當日仲有一個小插曲, 就係姑娘要量血壓, 係我對面床的婆婆訓著左, 姑娘叫左佢好多聲都唔應, 我都即刻起身望下, 心想 “ 千期唔好 “ , 之後個婆婆就醒左啦, 姑娘都話嚇親. 好彩係虛驚一場.

其實之前都準備左本書唸住係住院其間看, 打撥時間, 但係個人成日都會好攰同頭痛, 所以最終都係訓多.當晚同第一晚一樣, 到左7 時許我又覺得好頭痛, 唯有躺著休息一下, 順手用冷敷面. 感覺好點之後, 就去洗手間抹下身, 已經2天唔可以沖涼, 洗頭同刷牙, 真係好難忍受. 10點左右, 隨住電視聲的熄滅, 我又再一次睡著, 半夜4點左右醒一次, 去個洗手間返到床就再訓唔番啦!

早上7點鐘, 已經到左第三日. 係我最期待的一日, 因為予定今天可以出院返屋企. 早餐都係食無味粥, 其實我已經覺得無咩必要分早午晚三餐, 因為餐餐都係食同一樣的野. 之後佢再俾多罐奶我, 之前覺得最好味的野到左呢日我都已經唔係好想飲. 醫生早上再如常過來看我, 拆左我面上的紗布. 其實之前都唔係好明點解會有紗布, 其他同房的婆婆仲問我係咪趺親個下巴. 不過醫生解釋番原來係想塊面無咁腫所以先貼紗布. 並說下午左右會再看一看傷口, 無問題就可以出院. 醫生走左之後, 我就收拾行裝, 唸住兩三點左右應該就可以走. 點知一直等, 一直等, 醫生都未來, 姑娘都奇怪幫我打去問. 到左5點左右, 終於都等到醫生來啦. 佢都話因為好忙, 一直未有時間上來. 等醫生簽好所有文件, 姑娘就幫我拆除埋左手上的靜脈注射器, 拆左之後, 手上有一個大針孔, 而且附近的地方都瘀左. 不過就真正感覺到捱完啦!換返自己的衣服, 拎埋個袋, 同班婆婆講拜拜之後, 去藥房付錢拿藥, 跳上的士, 終於都返到屋企啦!

二話不說即刻沖涼同洗頭, 不過就知衰啦, 沖完出來個頭又暈又痛, 先知雖然已經出院, 但係身體都未完全恢復, 稍為操勞就會好易頭暈. 晚餐都係食粥, 但係就有味得多. 夜晚訓之前試下刷牙, 之前一直都只係可以漱口, 真係已經忍唔住啦. 刷的時候要好慢好小心, 大力一點就會好痛. 刷一個牙就用左我20分鐘, 最慘就係刷完牙之後又好頭痛. 其實做完手術之後, 我一直都覺得傷口唔係太痛, 姑娘問我要唔要止痛藥我都話唔使.但係反而血壓低引致的頭痛同發燒先最辛苦. 睇來我還要花多一些時間先可以康復呢! 

係度都要多謝來探望我, 發信息問候我的人. 我都希望同我同房的一班婆婆可以怏怏康復,早日出院啦!

 

 

呢兩個幾星期發生左好多事, 好多野都想寫, 但係無奈日日都無時間! 11月最忙的呢個星期, 晚晚都OT. 個人做到好攰, 好在呢個六日都可以放孖DAY, 係屋企大昏迷, 如果唔係肯定死梗.

回憶番之前發生的事........

1. 同左嘉嘉& CAMUS 食生日LUNCH, 見番好多舊同事之餘, 仲收到風我的舊老細就快要返日本啦! 我好好彩第一份工就遇到個咁好的老細. 係我的記憶中佢從來都未鬧過我不特只, 有時仲反過來受我的小姐脾氣. 真係好多謝佢對我的照顧同包容!! 希望佢返到日本後會加官晉爵, 開枝散茶啦!!

2. 呢個星期五同姊姊食飯餞行, 番"卓" 長腳蟹. 上年姊姊生日食過一次, 之後隔左好耐, 到今次終於有幾會再食. 上年食果間係最正的, 有燒蟹同蟹煲任食, 仲有蟹醋同芝麻醬任點唔嬲. 不過可惜果間已經無再做呢個放題, 所以今次惟有轉食另一間.  呢間價錢仲貴D,  但係就無左燒蟹同D蟹顯然係細隻D的.  而且因為我唔食醋, 所以想要芝麻醬, 但係佢要另外加錢, 咁唯有點豉油啦. 雖然無上次咁好, 但係都絕對唔差家, 就憑我地3個妹妹就" 桌 " 左12隻蟹啦...........!!!

3. 星期六姊姊就向美國出發啦. 佢走果日, 我真係好唔捨得...........因為成間房都係我家啦!!!哈哈哈..........
佢會係果邊過埋聖誕同生日, 2月頭先返. 佢就正啦！！！

今日下午休假半天, 約見麻醉科醫生.

其實之前剝智慧齒的時候都見過一次, 果次就好簡單, 只係局部麻醉加吊鹽水. 但係今次就要全身麻醉. 感覺恐怖好多. 一來唔知手術中發生咩事, 好唔安心. 而且仲要插喉以幫助呼吸, 聽聞之後個喉嚨會好痛. 而且全身麻醉的後遺症多好多, 例如會嘔等等.....

今日醫生仲同我抽埋血, 話正常情況都唔使輸血, 但係穩陣起見配定血先. 咁醫生就拿起一枝針筒, 叫我扯高衫袖, 捉實拳頭, 略為消毒一下, 就準備落針啦. 佢話我條血管好大絛, 十分清楚容易搵. 我唸應該都係因為太瘦所以青筋暴現.......... 佢落針前同我講有少少痛, 忍住, 如果驚就唔好望啦.........一落針, 都真係幾痛, 痛過打手臂, 但係雖然痛到單起隻眼, 我都斜啤住整個抽血過程. 因為係第一次(我唔夠秤捐血, 所以未試過抽血), 好想睇下. 好快鮮紅色的血就注滿左一支針筒, 跟住按一陣棉花就走得啦.

我問醫生我可唔可以知道血型, 佢話到做手術的時候可以問下醫生. 咁到時一定要記得問下醫生我係咩血型先得.......

係手術之後, 我唸我應該會極速消瘦, 所以我要係呢段時間盡量食多D野, 今日就約左朋友食TOMATO自助餐, 好飽飽..........呢家個口仲有蛋糕味............哈哈.............只可惜無栗子蛋糕!!

P.S. 唔知係咪太擔心個手術, 昨晚發左個夢見到自己手術後又發高燒, D護士又係咁幫我打針抽血, 我好辛苦想返屋企又唔返得, 好逼真, 一醒來好驚. 不過依家知道有人守護住我, 我應該可以平安渡過吧!

事發係今天下午, 會計部拎左一張guide的計數紙入黎, 問我地其中一項係claim 咩數.

睇一睇, 寫住" 張保仔 night tour " , 哈哈哈.....................成間房的人都即刻笑到人仰馬翻, 拍案叫絕..............
做左咁耐都唔知我地有呢隻tour > _ < !!!    查一查番先知原來係AQUALUNA, 雖然呢隻係新Tour, 唔知名都算啦, 但係都唔係自己亂作家嗎............仲要成個行程都無去過d咩所謂"張保仔"的地方. 真係令人汗顏呀!!!

之後再講講下, 聽說好似係第二個guide話俾佢知的, 但係我又唸, 唔係人講你就信家嗎, 咁無呢啦更都寫得出!!

我仲記得呢個guide之前仲叫我唔好教佢做guide, 講得咁巴閉, 但原來佢係真低家.....................!!!

繼8月尾阿伯被人踢走, 9月頭大師姐生日之後, 公司好似好耐無咩喜事啦. 望穿秋水終於等到TONY 生日啦.

咁o岩係正食大閘蟹的時節, 就來一個大閘蟹宴賀賀佢. 雖然大閘蟹唔係我的蟹中最愛, 但係對住一行8隻紅當當的大閘蟹, 真係好難抗拒的. 不得不冒住膽固醇飆升的風險係咁"啪". 啪第一隻的時候都覺得好正, d羔係咁"咇"出來, 之後同大師姐分多一人半隻, 不過果半隻就強差人意, 無咩羔都算啦, 最慘係d蟹肉好霉.

食完蟹, 飲杯薑茶 ( 個味好似蕃薯糖水, 好飲 ) , 再飲一個好足料的湯. ( 雖然個湯好多料, 不過我一貫要湯唔要渣, d料俾哂人 )

正式食主菜啦, 先有一個煨雞, 個色好似瑞士雞翼, 不過好味好多, 而且好"林" ,  我食隻雞翼唔使點咬已經骨肉分離啦. 入面仲有菇菇 !
跟住有個炒豆苗. ( ♪ ♩ 豆苗.....豆苗..........幼苗..........豆苗 ♬ ♪ ♭ )
有個海苔炸魚, 好好味, 之前係漢京樓都食過一次, 不過果次好後先上, 太飽食得好少. 今次上得正合時候, 啪左2大絛.......好開心 !!!
接住仲有蛋散炒飯 ( 其實係瑤柱蛋白炒飯 ) , 京蔥煨麵 ( 味都ok, 不過油左d) , 蒸餃餃 ( 因為好飽, 只係食左一隻)

全晚最驚喜的就係八寶飯, 陣陣清香撲鼻的桂花汁包圍住一圑圓圓的紫米. 其實食到尾聲都已經好飽, 但係食呢個甜點又唔會覺得太滯太甜. 總之就好好味啦 @ _ < v

至生日快樂人:

之前其他同事生日都可以親手整個蛋糕送俾佢地,其實本來今次我都好想整一個, 不過基於現在正係多事之秋, 唔好攪咁多野, 所以唯有係今餐以蟹代糕, 我唸你會更喜歡. 祝你生日快樂,並希望你以後過的每一天都會幸福快樂, 好似佢咁 ^ o ^

平價午餐都有以下的特點:

基本餐湯打頭陣

主菜 : 瘦猛猛, 乾增增, 無呢味道扒一件
           雪藏雜豆一大埋作點綴

凍飲加2蚊守尾門

平價午餐成日都好無用, 好自卑, 經常都傷害同激嬲貴價鐵板. 雖然平價午餐一無事處, 但係勝在夠平, 所以請貴價鐵板唔好放棄繼續食平價午餐啦 !

今天同事講起一班味之天使, 話我同萍果有d似. 今日專登返屋企睇電視, 細心望下萍果咩樣.........哈哈, 望落個外形係有dd似喎. 都係瘦瘦地, 頭髮長長咁. 哈哈, 其實似邊個都唔緊要, 最緊要靚!!!

依家味之天使有四個係水果, 四個係飲品. 再加的話可以加四個食物, 分別係 : 蛋散, 雞 , 蟹 同 蝦

呢排天氣清涼, 大家記得着夠衫, 唔好冷親呀! 凍凍地無野做就食多幾打雞同拆多兩籮蟹啦 ! 呢件事係由味の天使蛋散提醒您 ♥

記得大約一個月之前, 臨近去旅行先至病. 點知呢幾日又係咁, 係正忙的日子o黎病.

主因都係拜蛋散姊姊所賜, 佢傷風, 同佢訓埋同一間房, 食飯又一齊的我, 自然係高危一族. 其實我已經好小心, 但係都難逃一劫. 1號果晚訓訓下覺扎醒, 果時已經覺得有d野, 拍左粒藥再訓. 第二日下午去完睇牙返屋企途中又突然下大雨, 真係好似拍戲咁, 我又咁o岩無帶雨傘,又着住對超高跟鞋,想跑又跑唔快, 結果由頭濕到落腳指尾, 但係一返到屋企, 就咩雨都停哂,  真係邪到呀!! 咁樣淋一淋, 就死多兩錢重.

呢幾日個病情都好反覆, 一時鼻塞, 一時咳, 今日又開始覺得有d發燒 . 拍兩粒藥又好似好左d, 但係又好唔哂. 總之就好麻煩啦.

呢排財唔多, 但身子就好弱. 一病, 果種細細個無人理的感覺又返o黎啦.........